దిండి రిసార్ట్: సొగసుగా కనిపించే కొబ్బరి చెట్ల నడుమ.. గోదావరిలోని పచ్చని లంకలకు చేరువలో ఉన్న దిండి రిసార్ట్ పర్యాటకులను విశేషంగా ఆకట్టుకుంటుంది. ప్రశాంత వాతావరణంలో హాయిగా గడపాలని భావించేవారికి దిండి రిసార్ట్ చక్కని ఆతిథ్యం ఇస్తుంది. రాజమండ్రికి 82 కిమీల దూరంలో ఉన్న దిండిలో హరిత కోకోనట్ రిసార్ట్‌లో వాటర్ వాకింగ్, కమెండోనెట్, విలు విద్య తదితర వినోదాలతోపాటు స్విమ్మింగ్‌పూల్ కూడా అందుబాటులో ఉంది. ఇక్కడ హౌస్ బోట్‌లో షికార్ మరపురాని అనుభూతి ఇస్తుంది.అంతర్వేది: వశిష్ట గోదావరి సాగర ప్రవేశం చేసే ప్రాంతం ఇది. నర్శింహ క్షేత్రాల్లో ఒకటైన లక్ష్మీ నరసింహ స్వామి దేవస్థానం ఇక్కడ ఉంది. అంతర్వేదిలో గోదావరి నది సముద్రంలో కలిసే సంగమ ప్రదేశం చూడదగినది. ఇక్కడి అన్నా చెల్లెల్ల గట్టు వద్ద నీరు వేర్వేరు రంగుల్లో కనిపిస్తుంది. పర్యాటకులు బస చేసేందుకు ఇక్కడ హరివిల్లు రిసార్ట్, సోంపల్లి ప్రైవేట్ రిసార్ట్‌లు అందుబాటులో ఉన్నాయి.
ద్రాక్షారామం: ప్రశిద్ధ శైవ క్షేత్రమైన ద్రాక్షారామం గౌతమీ నదీ తీరంలోని కోటిపల్లికి సమీపంలో ఉంది. ఇక్కడ భీమేశ్వరుడు స్పటిక లింగంలో పూజలు అందుకుంటున్నాడు. 8వ శతాబ్దం నాటి ఈ ఆలయం త్రిలింగ క్షేత్రాలు, పంచారామాల్లో ఒకటిగా ప్రశిద్ధిగాంచింది. శివుడు.. సూర్య భగవానుడితో పూజలందించుకున్న పుణ్యక్షేత్రంగాను ఈ భీమేశ్వర ఆలయానికి పేరుంది.హోప్ ఐలాండ్: కాకినాడ పోర్టులోఉంది. గోదావరి నదీ తీరం నుంచి 18 కిమీలు ప్రయాణిస్తే హోప్ ఐలాండ్‌కు చేరుకోవచ్చు. తీరం నుంచి ఐలాండ్‌కు సముద్ర ప్రయాణం ఆహ్లాదాన్ని అందిస్తుంది. ఈ ద్వీపం పూర్తిస్థాయిలో అభివృద్ధికి నోచుకోలేదు. గోదావరి నది నుంచి కొట్టుకొచ్చే ఇసుక క్రమేనా ద్వీపంలా ఏర్పడి పర్యాటకులను ఆకట్టుకుంటోంది.ఇంకా ఎన్నో విశేషాలు:

• కోనసీమలో పండని పంట అంటూ ఉండదు. ఇక్కడ వరి తర్వాత ఎక్కువగా అరటిని పండిస్తారు. కొబ్బరి, అరటి, మామిడి, పనస, సపోటా, బత్తాయి ఇలా ఎన్నో రకాల తోటలను ఇక్కడ చూడొచ్చు. పూల మొక్కలతో పాటు కూరగాయలను కూడా ఇక్కడ పండిస్తారు.
• పురాతన ఆంధ్ర సంస్కృతి, సాంప్రదాయాలకు నిలయం కోనసీమ అని చెప్పుకోవచ్చు. అతిథులను గౌరవించడం ఇక్కడి ఆచారం. తోటి మనిషిని మర్యాదగా పలకరించడం కోనసీమ ప్రజల తర్వాతే ఎవరైనా. అందుకే, కొనసీమ వారు ఎక్కడున్నా.. సులభంగా గుర్తుపట్టేస్తారు.
• కొనసీమ వెళ్తే ఆత్రేయపురం పూతరేకులను తప్పకుండా రుచి చూడండి. తాపేశ్వరం కాజాను కూడా తప్పకుండా రుచి చూడండి.
• కోనసీమకు సమీప నగరమైన రాజమండ్రి నుంచి పాపికొండలు వెళ్లేందుకు లాంచీలు అందుబాటులో ఉంటాయి.
• దిండి, పాలవెల్లి రిసార్టుల్లో కూడా లాంచీలు అందుబాటులో ఉన్నాయి..
• మురమళ్ళలో శ్రీభద్రకాళి సమేత వీరేశ్వర స్వామి ఆలయం, ర్యాలీలోని జగన్మోహిని కేశవ స్వామి ఆలయం, ముక్తేశ్వరంలోని ముక్తేశ్వరాలయం, పలివెలలోని ఉమాకొప్పు లింగేశ్వర ఆలయం, మందపల్లిలోని శనీశ్వర ఆలయం తదితర ఆలయాలు దర్శించతగినవి.
• కోనసీమలో ఆహారాన్ని రుచి చూడకపోతే మీ పర్యాటన సంపూర్ణం కాదు. నాన్‌వేజ్ వంటకాలకు కోనసీమ పెట్టింది పేరు.
• కోడి ఫలావ్, కోడి కూర, ఆంధ్రా చేపల పులుసు, రొయ్యల ఇగురు, రొయ్యల వేపుడు, పీతల కూర అదిరిపోతాయి.
• నోరూరించే సాంప్రదాయ అల్పాహారంతో పాటు.. చక్కని భోజనం ఇక్కడ లభిస్తుంది.
• గౌతమీ నదికి ఉత్తరం వైపున ఉన్న కడియం, కడియపు లంకలోని పూల తోటలను, నర్సరీలను తప్పకుండా చూడండి.